مختارات من " رباعيات صلاح جاهين "

حاسب من الاحزان و حاســـــــب لها
حاسب علي رقابيك من حبلـــــــــــها
راح تنتهي و لابد راح تنتهــــــــــي
مش انتهت أحزان من قبلهــــــــــا؟
عجبي !!!

ولدي إليك بدل البالون ميت بالــــــون
انفخ وطرقع فيه علي كل لـــــــــــون
عساك تشوف بعينك مصيرالرجــــــال
المنفوخين في السترة و البنطلـــــون
عجبي !!!

لا تجــــــبر الإنسان ولا تــــحيره
يكفيه ما فــيه من عقل بيحيره
اللى النهارده بيطلبه ويشتهيه
هوا اللى بكره حيشتهى يغيره
عجبى !!!!!ا

الدنيا أوده كبيره للأنتظار.....
فيها أبن آدم زيه زي الحمار......
الهم واحد والملل مشترك............
ومفيش حمار بيحاول الأنتحار..........
عجبي

ضريح رخام فيه السعيد اندفن
و حفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن
عجبي !!

قالوا الشقيق بيمص دم الشقيق...
والناس ما هياش ناس بحق وحقيق........
قلبي رميته وجبت غيرو حجر......................
داب الحجر ورجعت قلبي رقيق..................
عجبي!!!!

ياللى انت بيتك قش مفروش بريش
تقوى عليه الريح .......يصبح مفيش
عجبى عليك حواليك مخالب كبار
وما لكش غير منقار وقادر تعيش
عجبى !!!!!!!ا

أنا كل يوم أسمع فلان عذبوه...
أسرح في بغداد والجزاير وأتوه...
ما اعجبش من اللي يطيق بجسمه العذاب...
وأعجب من اللي يطيق يعذب أخوه...
عجبي!!!!!


ياللي بتبحث عن إله تعبده..
بحث الغريق عن أي شئ ينجده ..
الله جميل وعليم ورحمن ورحيم.......
احمل صفاته........وانت راح توجده.......
عجبي!!!!!!!

أنا قلت كلمة وكان لها معنين
كما بطن واحده وتوأمين زين وشين
لو دنيا شر .... التوأم الخير يموت
ولو دنيا خير... الشر هيعيش منين ؟؟؟
عجبي!!!!!!!