مفاهيم إجتماعية سورية

Submitted by الدرويييش on 24-02-2007
المنتديات
المتن
مفاهيم إجتماعية سورية

حوار مع مواطـــــــــــن



ياريت تعطينا رأيك بالكلمات التالية :


الدولة :

المواطن : يعني الحكومة

– لاء يا أخي الدولة يعني المؤسسات الكهربا المي الهاتف البلدية الـ....

المواطن : إي إي فهمت ... خليها لربك

– كيف يعني :

المواطن : يعني الكهربا لهلق عم تنقطع و صرنا ما بعرف بأنو قرن

و الهاتف منيح و المي شي بتجي و شي ما بتجي و حالة بـ ... بلد ماشية بعفو الله .

الحكومة :

المواطن : يعني الدولة

– لاء يا أخي قصدي بالحكومة الوزراء و رئيس الوزراء

المواطن :أيوا و الله ما شفنا منن لا أصفر و لا أحمر ...

– يعني

المواطن : يعني متل قلتهن و البلد ماشي بحكومة و لا بلا حكومة.

الشعب :

المواطن : منتهي ... كيف هالشعب عايش ماعم بفهم

الوطن :

المواطن : العربي

–لاء يا أخي الوطن سوريا

المواطن : إمممممممممممم بلدنا و منحبها شو ما كانت .

المواطن :

المواطن : مسخرة

الوظيفة :

المواطن : أخ دخيلك على شي وحدة

– وحدة شو

المواطن : نفس الشي يا وظيفة يا موظفة .

الموظف :

المواطن : نيالو ولا على بالو بيداوم ست ساعات و بيعطل بجميع المناسبات

و بيقبض بهالمنحات غير اللي بيهفو إذا كان بشي محل منيح .

الأمن :

المواطن : دخيلك الله يبعدنا عنهن

– لاء يا أخ قصدي الأمن بالبلد

المواطن : آآآآه كويس كتير و الحمد لله

الحزب :

المواطن : منيح ....

– شو شعارو

المواطن : وحدة حرية ...

– لاء هي أهدافه

المواطن : آآآآ ه أمة عربية واحدة ذات رسالة خالدة

- شو هي الرسالة

المواطن : إي شو شايفني أنا اللي عملتو

- ليش حضرتك ما نك حزبي

المواطن : مبلى و عضو عامل كمان

– عضو عامل وين

المواطن : بالحزب

الحركة التصحيحية :

المواطن : سد الفرات

الراتب :

المواطن : مستورة و الحمد لله

المسؤول :

المواطن : طقم و مارسيدس و ما بيرد عليك

الفقر :

المواطن : ماحدا عم يموت من الجوع ؟؟؟

البطالة :

المواطن : مو هي اللي عم تعطي قروض ؟؟؟؟

الجولان :

المواطن : لك يا أخي عفنا حالنا ..... منرجعو بدمنا

الانترنت :

المواطن : موهادا الدبليو دبليو دبليو طوط كوم ..!!!

-بالظبط

المواطن : -----

الكمبيوتر :

المواطن : و الله بشوفهن عميلعبوا فيه شدة و ما بعمري لعبت فيه

- وين بتشوفهن

المواطن : بدوائر الدولة .

القضاء :

المواطن : أنو قضاء هاد

السيارة :

المواطن : حلم وإذا قدرنا نشتريها منين بدنا نجيب مصروفها

المستشفى الحكومي :

المواطن : بلوة يعني الواحد إسا فوق مصيبتو مصايب شي الدكتور مانو هون

شي قسم التصوير معطل شي منشار الجبيرة ما عم يشتغل و هادا

كلو فوق القرف و الصراصير و ريحة التواليت اللي معبيي المشفى

البنك :

المواطن : بيطلعلك روحك ليعطيك ربع البدك ياه هاد إذا ما دعفرتلك بشي

معقب معاملات و لطشك بشي 15% لتريح راسك .

المثقفين :

المواطن : كلهن خونة و عملاء ودايرين على مصالحهن الشخصية

- بس في منهن شرفاء و وطنيين .

المواطن : وينهن ماسمعنا فيهن هدول

الكرامة :

المواطن : و الله لعبهن حلو و بيضوها بـ

- بقصد الكرامة الإنسانية

المواطن : آه عفواً أنا فكرت الفريق ... و الله أهم شي أنو ما تعتاز حدا و تضل بكرامتك .

الشرف :

المواطن : أخي لا تصدق ما حدا شريف بس كل مين الو سعر

الشهامة و النخوة :

المواطن : حكي فاضي مشي الحيط الحيط و قول يارب السترة لأنو وقت

اللي بتوقع الفاس بالراس ما حدا بيقلك منوين انتي

المخدرات :

المواطن : الله يبعدنا عنها بس ياريت اقدر اشتغل فيها

الزواج :

المواطن : مصيبة و لحتى تحققها بدك تعمل اللي ما نعمل

الصديق :

المواطن : أبداً غير موجود عند الضيق

أكثر شيء جيد في البلد :

المواطن : الأمان اللي عايشين فيه

أكثر شيء سيء في البلد :

المواطن : الشوارع و الكهربا و الشغل و الشرطة و القضاء و القانون

و .............. و البني آدم

الديمقراطية :

المواطن : حكي فاضي عم يجيبونا ياه من بره ما بيجي منه غير

وجع الراس شعبنا ما بيجي غير بالرص .

- شو السبب انو مابيجي غير بالرص

المواطن : يا أخي هيك الله خالقوا كل ما عطوا شوية وش بيبلش يتفلسف

و يعملي فيها أفلاطون

مجلس الشعب :

المواطن : إرفع إيدك نزل إيدك ( بالإجماع )


الرشوة :

المواطن : أسرع طريقة لتخلص معاملتك بدون وجع راس و تعجيز الموظفين .

شكوى إدارية :

المواطن : متل اللي عم يضحك عحالو

المحامي :

المواطن : نصاب بالقانون

الكتاب و القراءة :

المواطن : مين فاضيلهون

التلفزيون السوري:

المواطن : بس نشرة الأخبار و مسلسلات رمضان

شرطي المرور :

المواطن : صفيرة شغالة على طول لحتى تطفيها بدك تطعميها

الأمنية الكبرى :

المواطن : شوبدك تعد لتعد




و إلى اللقاء في مفاهيم جديدة

الدرويش حسن

التعليقات

nayef

مفاهيم واقعية درويش وحلوة مقالتك اخذت منها مايلي
الأمن : المواطن : دخيلك الله يبعدنا عنهن
برأيك ليش كل المواطنين السوريين بيتحاشوا الأمن ولو كانوا تحت القانون ووين الخطأ بهالشي وكيف ممكن نصلّحوا
اللغة
Arabic

دعوة للمشاركة

موقع الأيهم صالح يرحب بالمشاركات والتعليقات ويدعو القراء الراغبين بالمشاركة إلى فتح حساب في الموقع أو تسجيل الدخول إلى حسابهم. المزيد من المعلومات متاح في صفحة المجتمع.